Пабыць там, адчуць сябе партнёрам многіх вопытных тураператараў, пагутарыць з калегамі, параўнаць сваю работу з работай турыстычных цэнтраў краіны і замежжа, зразумець, што ў нас ідзе добра, а над чым яшчэ трэба натхнёна працаваць – хіба гэта не найлепшы вопыт?  І мы ўжо каторы год едзем па гэты вопыт.

Падрыхтоўка да выставы вялася на працягу некалькіх месяцаў. Каб годна прадставіць сваю пляцоўку, неабходна было яе абсталяваць, падрыхтаваць раздатачны матэрыял (плакаты, флаеры, візіткі), сувенірную прадукцыю (ручкі, статуэткі, пакеты). А яшчэ мы прыдумалі вобраз Дзятлаўшчыны турыстычнай – і гэта Дзятліца, дзяўчына з легенды пра назву нашага горада. Менавіта яна стала брэндам, па якім пазнаюць Дзятлава, і лагатыпам, знакам, што адрознівае нас ад іншых. Дзяўчына Дзятліца, прыгожая лялька, была зроблена майстрам Вольгай Жэгала. Тры дні, як той алавяны салдацік, адстаяла на выставе, прываблівала наведвальнікаў і прывезла дадому шмат карысных кантактаў і дамоўленасцей. Наша паліграфічная і сувенірная прадукцыя ўдзельнічала ў конкурсе, адстойвала на выставе Гродзенскую вобласць. Сярод экспанатаў на тым конкурсе красавалася і Дзятліца.

Паліграфічная прадукцыя трапіла ў рукі многіх наведвальнікаў, якія, мы ўпэўнены, абавязкова завітаюць на Дзятлаўшчыну.

У гэтым годзе быў зроблены новы выставачны стэнд, які раскрыў кірункі турызму, што развіваюцца ў нашым раёне, – Дзятлаўшчына гераічная, непаўторная, таямнічая і гасцінная. Цэнтральнай сёлета, у год 80-годдзя вызвалення Беларусі ад нямецка-фашысцкіх захопнікаў, стала патрыятычная тэматыка, таму было распрацавана восем чэк-лістоў, дзякуючы якім кожны жадаючы можа выбраць праграму падарожжа.

Сёлета на выставе “Адпачынак- 2024”  былі прадстаўлены ўсе рэгіёны рэспублікі, а таксама ставілася задача знайсці партнёраў для супрацоўніцтва і падпісаць дамоўленасці з рэгіёнамі Расійскай Федэрацыі. І з задачай наша дэлегацыя справілася паспяхова. Падпісаны дамоўленасці з аўтаномнымі некамерцыйнымі арганізацыямі “Турыстычны інфармацыйны цэнтр Уладзімірскай вобласці”, “Цэнтр развіцця турызму ў Заўраллі”, “Цэнтр развіцця турызму Смаленскай вобласці”. Мы ўпэўнены, што супрацоўніцтва дазволіць сустракаць турыстаў з суседняй краіны на нашай гасціннай дзятлаўскай зямлі.

А паколькі асноўнай тэмай нашага выставачнага стэнда стала патрыятычная, то для наведвальнікаў была падрыхтавана цэлая інтэрактыўная праграма, якую ажыццяўлялі супрацоўнікі Дзятлаўскай дзіцячай школы мастацтваў і Дзятлаўскага лясгаса – вялікі дзякуй ім за гэта. Наведвальнікі на нашым стэндзе маглі разгадаць красворд, злажыць пазлы на магнітнай дошцы па чатырох накірунках развіцця турызму, праспяваць разам з артыстамі ваенную песню і, вядома, станцаваць. А яшчэ Дзятлаўскі лясгас прапанаваў наведвальнікам дэгустацыю мясцовага мёду розных гатункаў. Такі мёд можа набыць у сезон любы падарожнік, які наведае домік паляўнічага ў Вензавецкім лясніцтве.

Патрыятычныя праграмы прывабілі ўвагу многіх прадстаўнікоў сістэмы адукацыі з розных рэгіёнаў рэспублікі, і хацелася б у бліжэйшым будучым убачыць на Дзятлаўшчыне школьнікаў з суседніх раёнаў.

Асаблівы шык надавалі пляцоўцы майстар-класы. Між іншым, майстар-клас кераміста Анатоля Кардаша з Наваельні быў адзіным на ўсёй выставе. Дапамагалі прадстаўляць Дзятлаўшчыну і майстар лозапляцення Сяргей Балыкоў з Дварца, а таксама майстар вырабаў са скуры Анжэла Латушка. Майстар-класы прываблівалі наведвальнікаў магчымасцю за кароткі час зрабіць выраб сваімі рукамі і забраць яго на памяць, а таксама набыць тое, што спадабалася.

Высока ацэнена і выступленне на прэс-канферэнцыі галоўнага спецыяліста па турызму Дзятлаўскага райвыканкама Наталлі Калодка, якая прадставіла патрыятычны маршрут “Па слядах герояў”. Ён быў распрацаваны сёлета і карыстаецца папулярнасцю ў школ раёна. З канца студзеня на маршруце праведзена каля 30 экскурсій.

Па традыцыі на выставе пляцоўка нашага раёна разыгрывала сертыфікат на турыстычную праграму “Па слядах герояў”, які выйграў жыхар  Мастоўскага раёна.

Калі падводзіць вынікі ўдзелу ў выставе “Адпачынак-2024”, то можна сказаць смела: нам усё ўдалося! Годна прадставілі турыстычную сферу раёна, падпісалі тры пагадненні з цэнтрамі развіцця турызму, пашырылі кантакты для супрацоўніцтва з турыстычнымі фірмамі нашай рэспублікі. Тры дні напружанай працы, будзем спадзявацца, не прайшлі дарэмна, і ў хуткім часе чакаем турыстаў з розных рэгіёнаў нашай краіны.

Напрыканцы хацелі б выказаць падзяку Дзятлаўскаму райвыканкаму і асабіста яго старшыні Андрэю Садоўскаму за разуменне важнасці развіцця турызму ў рэгіёне, а таксама за фінансавую падтрымку ў набыцці выставачнага абсталявання, кіраўніцтву і ўдзельнікам дэлегацыі Дзятлаўскай школы мастацтваў і Дзятлаўскага лясгаса, майстрам-рамеснікам. Без вашай падтрымкі і вашага ўдзелу Дзятлаўшчына не заззяла б так ярка на выставе “Адпачынак-2024”.

 Яго ўдзельнікі вызначаць стратэгічныя напрамкі развіцця нашай дзяржавы, прымуць важныя рашэнні, якія датычацца яе палітычнага жыцця. У ліку дэлегатаў – намеснік дырэктара па вучэбнай рабоце Новаяльнянскай сярэдняй школы Таццяна Умоўская.

Таццяна Аляксандраўна падзялілася сваім меркаваннем аб будучай сустрэчы:

– Быць дэлегатам Усебеларускага народнага сходу, на ўзроўні рэспублікі прадстаўляць Дзятлаўшчыну і маю родную Наваельню – вялікі гонар для мяне. Разам з тым адчуваю сур’ёзную адказнасць ад таго, што маю магчымасць прымаць непасрэдны ўдзел у вырашэнні найважнейшых для нашай краіны пытанняў. Галоўным на сёння лічу далейшае сацыяльна-эканамічнае развіццё дзяржавы, у тым ліку ў сферы адукацыі, умацаванне міру, стабільнасці і бяспекі ў нашай краіне. Сваю задачу як дэлегата бачу ў тым, каб яшчэ раз даказаць: мы, жанчыны, актыўныя і ініцыятыўныя, можам і ўмеем многае, у стане вырашаць пытанні на месцах, такім чынам працуючы на карысць усёй Беларусі. Заўтра будзем уважліва слухаць Прэзідэнта, разам вырашаць, у якім напрамку рухацца далей.

Працавала некалькі груп. З калектывам Круцілавіцкай сярэдняй школы сустрэлася група старшыні раённага Савета дэпутатаў Аляксандра Бараноўскага.

Абмеркавалі важныя для нашай краіны і грамадства пытанні, сярод якіх – Усебеларускі народны сход, як гарант палітычнай стабільнасці і суверэнітэту. Узгадалі, што УНС быў створаны у 1996 годзе па ініцыятыве Прэзідэнта Беларусі Аляксандра Лукашэнкі. УНС прадаставіў грамадзянам магчымасць непасрэднага абмеркавання і прыняцця рашэнняў. Яшчэ больш яго роля ўзрасла на сучасным этапе, калі для беларусаў барацьба за захаванне ўласнай дзяржаўнасці ва ўмовах глабальнага геапалітычнага супрацьстаяння і знешняга ціску набыла лёсавызначальны характар. Пасля ўступлення ў сілу 15 сакавіка 2022 года змяненняў і дапаўненняў у Канстытуцыю Рэспублікі Беларусь і прыняцця Закона “Аб Усебеларускім народным сходзе” статус УНС значна змяніўся. Усебеларускі народны сход стаў вышэйшым прадстаўнічым органам народаўладдзя, вызначана пастаянная максімальная колькасць яго дэлегатаў і паўнамоцтвы. Сход можа адмяняць прававыя акты, іншыя рашэнні дзяржаўных органаў, што супярэчаць інтарэсам нацыянальнай бяспекі, прымае рашэнні аб зацвярджэнні асноўных кірункаў унутранай і знешняй палітыкі, праграмы сацыяльна-эканамічнага развіцця Беларусі. Па ініцыятыве кіраўніка дзяржавы ён надзелены правам прапаноўваць змяненні і дапаўненні ў Канстытуцыю. Правазаканадаўчая ініцыятыва рэалізуецца УНС па сродках унясення ў Палату прадстаўнікоў Нацыянальнага сходу Рэспублікі Беларусь праектаў законаў. Разам з тым Усебеларускі народны сход не замяняе парламент, бо яны разыходзяцца па прававым статусе. Сход мае права разглядаць пытанне па імпічменце, аб легітымнасці выбараў, зацвярджае Ваенную дактрыну, Канцэпцыю нацыянальнай бяспекі, можа прыняць рашэнне аб магчымасці накіравання міратворчых місій за межы Беларусі. Ён выбірае старшыняў, намеснікаў старшыні і суддзяў Канстытуцыйнага і Вярхоўнага судоў Рэспублікі Беларусь, старшыню і членаў Цэнтральнай выбарчай камісіі, змяшчае іх з пасадаў па прычынах, прадугледжаных заканадаўствам, зацвярджае састаў народных засядацеляў Вярхоўнага суда Рэспублікі Беларусь.

Такім чынам, у палітычнай сістэме нашай краіны створаны дадатковы механізм “страхоўкі”, які ў крытычных сітуацыях будзе выступаць у ролі “арбітра” і выключыць магчымасць паралізавання сістэмы дзяржаўнага кіравання.

Дэлегаты VII Усебеларускага народнага сходу ўжо вядомыя. Гэта патрыёты Радзімы, якія не баяцца выказваць сваё меркаванне і адстойваць пазіцыю ў вырашэнні пытанняў на карысць людзей.

Як адзначыў Аляксандр Бараноўскі, дэлегатамі ад Дзятлаўскага раёна сталі старшыня райвыканкама Андрэй Садоўскі, дырэктар сярэдняй школы № 1 горада Дзятлава Марына Нячай, дырэктар Цэнтра сацыяльнага абслугоўвання насельніцтва Дзятлаўскага раёна Таццяна Нікіпорчык, намеснік дырэктара па вучэбнай рабоце Новаяльнянскай сярэдняй школы Таццяна Умоўская. Пасяджэнне прызначана на 24-25 красавіка. Дэлегаты выберуць старшыню УНС, яго намеснікаў, членаў Прэзідыума. У беларускім грамадстве адчуваецца запыт на бяспеку і стабільнасць, таму сярод асноўных пытанняў будзе зацвярджэнне Канцэпцыі нацыянальнай бяспекі і Ваеннай дактрыны – дакументаў, скіраваных на абарону суверэнітэту нашай дзяржавы і стварэнне шматпалярнага свету.

У рамках Адзінага дня інфармавання таксама былі абмеркаваны такія актуальныя тэмы, як “Супрацьдзеянне і прафілактыка злачыннасці, звязанай з замахам на палавую недатыкальнасць і палавую свабоду непаўналетніх у Рэспубліцы Беларусь”, “Адказнасць за рэгістрацыю на Інтэрнэт-рэсурсах, прызнаных экстрэмісцкімі, распаўсюджванне экстрэмісцкіх матэрыялаў у глабальнай сетцы Інтэрнэт”, “Выпальванне сухой расліннасці. Адпачынак на прыродзе. Акцыя “За бяспеку разам!”.